طلع فحياتك بشويه ولا تطيح بقوة سر السلم اللي كيصنع الرجال وكيصنع النجاح الحقيقي
 |
| طلع فحياتك بشويه ولا تطيح بقوة سر السلم اللي كيصنع الرجال وكيصنع النجاح الحقيقي |
السلام عليكم ورحمة الله وبركاته
اليوم بغيت نهضر معاكم على واحد الفكرة اللي ديما كاترجع ليا فالحياة ديالي وعلى حساب هاد الفكرة كانقدر نفهم بزاف ديال الحوايج اللي وقعات ليا وقدرو يوقعو لأي واحد باغي يدير شي حاجة فالمستقبل
الناس كاملين كيشوفو النجاح على أنه شي حاجة كتجي مره واحده ولا كتجي بزربة ولا كيقولو ليك غير خاصك تكون شاطر وغا توصّل ولكن الواقع كتير من هادشي وبزاف
أنا كنشوف الطريق ديال التجارة والعمل والحياة كاملة بحال واحد السّلم طويل واحد السلم اللي فيه بزاف ديال الدروج وهاد الدروج ماشي بحال بحال كل درجه فيهم كتحتاج جهد ووقت وصبر ومحنه وشحال من حاجه اللي كتستهلك من الطاقة ديال الإنسان
الإنسان إلا وقف قدام هاد السلم كيجيه كبير بزاف وكيجيه صعيب وكيبان ليه بلي خاصو يطلع بواحد النفِس طويل وبهادك الصبر اللي كيخلّي الواحد يكمل غير بشويه بشويه
وهاد الفكرة كنحس بيها من صغري من اللي كنت كنشوف كبار مني كيخدمو وكيطلعو بشوية ديال الخطوات وكنت كنقول علاش ما كنقزوش ونطلعو الفوق مره وحده
ولكن ملي كبرت وفهمت الحياة مزيان عرفت علاش
حيت السلم ماشي معمّر غير بالمراحل السهلة كاينين درجات اللي كتبكيك ودرجات اللي كتفرحك ودرجات اللي كتعلمك ودرجات اللي كتطيحك أرضا وتبقى واقف تتسنى القوة ترجع ليك
وهنا كنوليو نفهمو بلي النجاح راه ماشي سباق ديال الجري النجاح راه تسلّق جبل وتسلق الجبل ما كيجيش بواحد القفزة كيجي خطوة خطوة
أنا فالحياة ديالي ديما كانآمن بفكرة بلي خاص الإنسان يطلع درج بعد درج ماشي ينقز من التحت للفوق بحال واحد القفزة اللي ما فيها لا تركيز لا أساس
حيت إلا طلّعك شي واحد بزيادة ولا عطاك شي منصب ماشي ديالك ولا ركبتي على شي فلوس لي ماشي ديالك ولا درتي شي طريق مختصرة يمكن تفرح شوية ولكن مني كتسالي هاد الفرحة كتلقى راسك فمستوى عمرك ما وصلتي ليه بعرق جبينك
وهادشي كيجي معاه مشاكل اللي صعيب تهرب منهم
كاينين ناس كيمشيو فالحياة بمنطق الصبّر والمهل كيخدمو نهار على نهار يجمعو راس مال شوية بشوية كيبدلو مشاريع غير بشويه بلا ما يطيحو راسهم فالمخاطر الكبيرة
وكاينين ناس خرين كيمشيو منطق آخر اللي هو نقز نقز نقز كيقول ليك ماعندي صبر خاصني نبان دابا خاصني نبان فالمستوى اللي كيبان فيه فلان وفلان
وهنا المشكل الكبير
حيت السلم اللي كنهضرو عليه كيحتاج جهد وعمر وراحة نفسية
كل درجه فيها تعرق وتعب كل درجه فيها تعلم ربما كتدوز شهور كتتعلم غير خدمة صغيرة باش تقدر توصل للدرجة اللي من بعدها
شي مرات كتدوز سنين كتقاتل على شي فكرة باش تنجحها وفي الآخر كتلقى راسك ما وصلتيش لحيث كنت باغي ولكن تعلمتي من الطريق ما يكفي باش تبدا من جديد
أما إلى كنت كتسلق السلم بواحد الطريق اللي ماشي طبيعية بحال لي كيكون معولين على الدين اللي مغاديش يقدرو يخلصوه ولا على شيكايات ولا كريديات ولا طرق ساهلة باش يبان فلوس بلا تعب
فهنا كتكون البدايه ديال الطيحيات القاسحة فالحياة
لأنك كتكون وصلت لفوق بلا أساس ماشي بعرقك
ومن لي كتطيح كتطيح على الأرض دفعة وحده
مثلا إلى كنت طالع درج بدرج وفشلت فشي درجه معينة غالبا كتطيح درجة وحدة لتحت وكتقدر ترجع تجمع القوة وترجع تعاود تطلع
ولكن ملي كتقز من التحت للفوق بلا ترتيب وكتوصل لدرجة ماشي ديالك وكتطيح من تم راك كتطيح فالسفلى كتطيح طيحه كتكسّر العظم كتوجع القلب كتخلي النفس ماقاداش تبدا من جديد
وكاين واحد النوع ديال الطيحيات اللي كتخلي الإنسان يعيش معاق فكريا حيث كيولي ماعندو ثقة فراسو مايعرف منين يبدا كيولي كيعيش دايم فخوف ودايم فتوتر
وهادشي علاش كنقول للشباب والناس كاملين اللي باغيين يطلقو مشاريع ديالهم
سيرو بشوية
البدايه ماكتحتاجش قفزات كتحتاج عقل وقلب وصبر
ماشي ضروري تحقق النجاح السريع المهم هو تبني الاساس الصحيح
لأن الإنسان إلا بنا الدار ديالو على أساس خاوي أول ريح كتطيحها
وأول مشكلة كتخليه يرجع للصفر
وهنا كنرجع لفكرة السلم اللي قلت ليكم
الدرجات ماشي غير خشبات كتجمعو بيهم السلم هادو تجارب حياتية
كل درجه هي درس
كل درجه هي قصة
كل درجه هي واحد المرحلة اللي كتخليك تنضج وتكبر وتتعلم
وهاد الدروس هما اللي كيعطيو قيمة للإنسان
حيت النجاح بلا تجربة كيبقا نجاح ناقص
والفلوس بلا معرفة كيبقاو فلوس ماكتدومش
والمشروع بلا أساس كيبقا مشروع قابل للسقوط في أي لحظه
كاينين بزاف ناس كيبانو ليا كيسولو كيفاش ننجحو كيفاش نديرو الفلوس كيفاش نكبر المشروع ديالي كيفاش ندير داكشي اللي دايرين فلان وفلان
وكانجاوب ديما بنفس المبدأ
السلم
السلم طويل ولكن ماشي مستحيل
خاص غير شوية ديال النفس وشوية ديال الإرادة وشوية ديال الإيمان براسك
وحاجة مهمه بزاف هي ما تستعجلش
حيت الاستعجال كيعميك على الطريق الصحيحة
والطريق القصيرة مرات كتكون هي الأخطر
ملي كنهضر مع الشباب اللي تايهين وماعارفين منين يبداو كنقول ليهم بداو بدرجة بسيطة
تعلم حاجة
خدم عليها
كبرها
ومن بعد زيد
ماشي ضروري تبان دابا
المهم تبان ملي تكون مستعد
واحد النهار كنت كنسمع واحد السيد كبير فالسن كيقول كلام زوين
قال لي الحياه بحال واحد الغرسة
يلا غرستيها اليوم ما غتطيّبش معاك غدا
خاصها صبر خاصها شتاء وصيف خاصها الماء والتراب والوقت
ولكن مني كتطيب كتولّي كتفرحك
وكذلك النجاح
وحتى مني كنشوف تجارب ديال الناس اللي وصلو فالحياة كنلقى أنهم ماوصلوش بقفزات
وصلو بعرق
وصلو بليل بلا نعاس
وصلو بدموع
وصلو بسنين
حيت الطريق لي كتجي بالساهل كتغدرك نهار
ولكن الطريق اللي كتجي بصعوبه كتسمى قيمة كتسمى تجربه كتسمى معدن قوي
دابا نخليكم مع واحد الحقيقة اللي أي واحد خاصو يعرفها
ما كاين نجاح بلا سقوط
وماكاين طلوع بلا هبوط
وماكاين قوة بلا ضعيف مرّ
ولكن الفرق بين الناس اللي كتنجح وبين الناس اللي كتفشل هو النفس
هو النفس الطويل
هو اللي كيخلي الواحد يتحمل يتقبل يتعلم ويرجع يكمل
وفي الأخير بغيت نقول للشباب كاملين
اللي عندو حلم حافظ عليه
واللي عندو هدف طلع ليه درجه بدرجه
واللي كيحاول ينقز من التحت للفوق غير باش يبان غادي يطيح طيحة كتقصيه
أما اللي كيمشي بشويه كيبني الطريق ديالو بواحد الطريقة اللي ماكتخليهش يضيع
حيت حتى إلا وقع كيوقف
وحتى إلا وقف كيعاود يتحرك
والأيام كتدور والفرص كتجي والمهم هو تبقى فطريقك وما تبدلهاش غير على قبل السرعه
وكنتمنى ربي يوفق الجميع
والسلام عليكم ورحمة الله وبركاته