السر الحقيقي وراء تحقيق أول عشرين مبيعة فالتجارة الإلكترونية

كاين واحد اللحظة فحياة أي واحد باغي يبدا التجارة الإلكترونية اللي كتكون حاسمة بزاف وكتغيّر ليه كامل المسار ديالو اللحظة اللي كيشوف فيها أول مبيعة كتدوز كتكون فرحه ولكن ماشي هاديك هي اللحظة اللي كتبدل كلشي اللحظة اللي كتبدل حياتك هي ملي كتدوز لأول عشرين مبيعة هنا فين كيتولد عندك اليقين باللي الطريق اللي داخل لها هي الطريق الصح وأن المشروع ديالك فعلا يقدر يكبر ويتحول من مجرد تجربة لإلى تجارة كتجيب الفلوس كل شهر

الناس اللي مازالين جداد فالتجارة الإلكترونية ديما كيطيحو فواحد الفخ الكبير اللي هو الوهم الوهم ديال اللي كيقول ليك غتدخل وغتجيب آلاف الطلبيات وانت باقي ماعارف حتى كيفاش كيدور الإعلان وكيفاش كتقلب على منتج صالح ولا كيفاش تقدم عرض زوين الزبدة هي ان التجارة ماشي سحر وماشي زر واحد كتضغط عليه وكيجيبو ليك الكوموندات التجارة تتبنا بالتدريج وكتبدأ من التحت وكتطلع شويه بشويه بحال الكاراج اللي كيبدا بشي موديلات قليلة ومن بعد كيتوسع وكيكبر

السر اللي لازم تفهمه مزيان هو انك إلا عرفت كيفاش تحقق أول عشرين مبيعة ديالك عرف بأن أربعين راه قريبة وستين غتوصلها ومية غتكون مجرد وقت علاش لأن الطريق اللي جابت لك أول ربح غادي دوز منها باش تضاعف الأرباح وتزيد توسع المشروع ديالك

المشكل اللي كيعاني منه أغلب المبتدئين هو أن التركيز ديالهم كيكون مشتت باغيين يديرو كلشي في نفس الوقت إعلان محتوى واتساب خمس منتجات سبع نيشات وفي الأخير كيضيعو الوقت والطاقة وماكيبانو لا بنتيجة لا ولو ولكن إلا ديرتي واحد القاعدة في بالك غتختصر الطريق كاملة وهي انك خاصك تبدا بمنتج واحد وبسورس ترافيك واحد وبعرض قوي واحد وتقاتل غير عليه حتى يخرج لك أول عشرين مبيعة ومن بعد عاد تبدا توسع شوية بشوية

فاش كنبغي نشرح للناس المعادلة ديال التجارة كنتسناهم يفهمو غير هاد الجملة راه الناس ماكتشريش المنتج الناس كتشري النتيجة
كتمشي تبيع صباط ماشي خاصك توريه ليه وتحكي ليه على الثوب والقالب والجلد لا كتبيع ليه الراحة اللي غيحس بها ملي يلبس الصباط كتبيع ليه الشكل اللي غيطلع به كتبيع ليه الثقة اللي غيعطيه ليه البرودوي كتحويل مظهره وراحته فنهار كامل
النقطة هنا هي ان داكشي اللي كيخلي واحد يخلص عندك ماشي الثمن ماشي الشحن ماشي التفاصيل هو الاحساس بالنتيجة اللي غيعيشها من بعد ما يشري المنتج ديالك

ولاننا فالسوق المغربي كنعيشو بزاف مشاكل ديال قلة الموديلات ولا المنتجات اللي كيحتاجوها الناس وملقاوهاش هنا فانت عندك فرصة ذهبية بزاف الأنواع ماكايناش والتنوع ضعيف والناس باغيين الجديد سواء فالصباط البيجامات الملابس الداخلية الكوسميتيك الديكور الى غير ذلك مجرد انك تجيب موديل طالع فشيين ولا تيمو وعادي تصاوبو عند حرايفي ولا معمل هنا وتقدم ليه جودة زوينة وثمن مناسب را كتسد فجوة كبيرة في السوق
والزبون المغربي فاش كيحس بالفرق ديال الثمن والجودة غادي يشري بلا ما يفكر بزاف

وهنا فين كيدخل العرض القوي العرض ماشي غير واحد الصورة وسالينا العرض هو ثلاث عناصر الوعد البروف والتمن
الوعد كتقول لزبون اش غيستافد شنو النتيجة ماشي التفاصيل
البروف هما الناس اللي شراو عندك وبانو راضين على المنتج وهادشي كيجي مع الوقت وبالبيع الأول والثاني وهنا ديما كتحسن البرودوي وتطور الجودة حتى يبداو الزبناء يردو عليك ملاحظات مزيانة
التمن خاصو يكون معقول ويخلي عندك هامش ربح محترم باش تقدر تكبر المشروع ديالك وتعاود تستثمر ماشي تربح عشرة دراهم وتبقا تفرح لأن الغرض ماشي تبيع واحد الغرض تبني بيزنس

من بعد كتوصل للمرحلة اللي كتقلب فيها على الترافيك هنا كنرجعو للبداية ما تكترش السورسات اول حاجة وخا تكون كتعرف الاعلانات والريفيلز والمحتوى والواتساب تبدا غير بسورس واحد
وخا نقولها ليك بصراحة اللي بادي وماعندوش ميزانية كبيرة يبدا بواتساب ما غاديش يكلف بزاف ولكنه غادي يعطيك فكرة واش الناس باغيين المنتج واش العرض مقنع واش الثمن مناسب

كنبغي نوضح واحد الحقيقة اللي بزاف الناس كيخافو يسمعوها وهي انك غتحتاج تجرب بزاف فالأول وتفشل مرة جوج ثلاثة عاد غيخرج ليك واحد البرودوي الوينر اللي غيعطيك النقلة وماغادي تحس بالراحة إلا ملي تفهم ان التجارة فيها تيستينغ ومزال غادير ليه ولكن التيست ماشي عشوائي التيست خاصو يكون مبني على البحث ديال السوق وتحليل المنافسة والتجارب اللي كيديرو الناس اللي سبقوك فالميدان

والأهم أنك تبقى مركز ما تشتتش جهودك وما تدخلش بخمس نيشات خليها نيش واحد ومنتوج واحد وعرض واحد واعلان واحد وترافيك واحد حتى يبان الضوء فالأول ومن بعد تبدا توسع برية

وبالصح وبلا ما ندور فالكلام إلا بغيتي فعلا توصل لأول عشرين مبيعة خاصك تكون مقاتل ما تستسلمش قدام أول إعلان ما جابش نتيجة ولا زبون قالك التمن غالي ولا شي كوموند تسرقات من الكورير ولا شي واحد ماجاوبشك ولا شي برودوي ماتقبلش
هادشي عادي بزاف بالعكس هادو دروس باش تخرج اقوى وتصلح الأخطاء وتولي كتفهم السوق كيف كيتحرك وكيفاش كيخدم الناس اللي وصلو قبلك

باش نختم الفكرة كاملة السر الحقيقي باش تجيب أول عشرين مبيعة هو ثلاث كلمات
منتج صحيح عرض قوي تركيز بدون تشتيت
وإلا قدرت تجمع هاد الثلاثة كون على يقين أن الطريق غتفتح قدامك وباقي الخير
وكل مبيعة كتجيك غتزيدك ثقة فخدمتك وفي راسك وفي المستقبل اللي غادي تبنيه بيديك

تعديل المقال