السر ماشي فالطرق الجاهزة ولكن فراسك انت

السر ماشي فالطرق الجاهزة ولكن فراسك انت

 الانترنت بحال السحر كنت نصدق كل كلمة كيقولها داك اليوتيوبر وكنبقا نطبق الخطوات بحال الروبوت ولكن ملي كتفوت الوقت كتعرف بلي الحقيقة ماغاديش تجي هاكا

فالبداية كنت كنحس بلي الانترنت بحال واحد السوق كبير كيدور فيه كلشي وكل واحد كيناديك من باب يقول ليك ها الطريقة ها هادي غادي تنجح ها هادي مضمونة وانا كنت نطيح فالفخ ديالهم نضيع الوقت والجهد وحتى الفلوس بلا نتيجة

كنسهر الليل كامل نفتح المواقع نسجل فالحسابات نستعمل الأدوات اللي كيشرحو وفالاخر ماكان حتى ريال وكنفيق النهار معصب كنقول فراسي علاش انا مانجحش علاش هما داروها وانا لا ولكن ملي درت عقل وفكرت شوية عرفت بلي السر ماشي فالخطوات السر كاين فكيفاش كتتعامل مع راسك ومع المهارات ديالك

الربح من الانترنت ماشي فنقل ماشي تقلد فلان ولا علان لان اي حاجة كتولي معروفة كتولي عامرة بالناس وكيولي المنافسة فيها بحال الحرب مابقاش فيها الربح الكبير الربح كاين فالحاجة اللي كتكون مختلفة فالمهارة اللي كتكون عندك فالفكرة اللي كتقدر تخلق بيها شي حاجة جديدة

انا ملي فهمت هاد القضية وليت كنركز على راسي شنو كنعرف ندير شنو نقدر نتعلم شنو المهارة اللي ممكن تخليني نبان مختلف وبديت نجرّب بشوية بشوية

مثلا تعلمت الشوية لمونطاج وليت كنستعملو بطريقة مختلفة نجيب معلومات ماشي كلشي عارفها ونقدمها فالاسلوب ديالي

وهادي الحاجة اللي خاص الناس يعرفوها النجاح كاين فراسك انت فراسك خاصك تبني المهارة ديالك الى ماعندكش تبدا تتعلم الانترنت عامر بالكورسات وبالفيديوهات وبالناس اللي كيشرحو وحتى بلاش ماخصك غير تكون عندك عزيمة

وماشي غير المهارة حتى العقلية خاصك ماتكونش بحال القطيع تشوف الناس كاملين غاديين فطريق وحدة وتبقى تابعهم بلا ما تسول راسك فين غاديين ولا واش غادي تلحق بيهم ولا لا خاصك توقف وتسول راسك انا شنو نقدر نبدع فيه شنو الحاجة اللي ماناقصاش فالانترنت ونقدر انا نجيبها

ملي بدا التيك توك الناس كانو كيشوفوه لعب ديال الدراري ولكن اللي كان عندو عين بعيدة استغل المنصة وعطا محتوى مختلف دابا ولى عندو فرص كبيرة وفلوس وبزاف منهم دارو البراندات معروفة نفس الشي وقع فبداية ليوتيوب اللي بداو معاه من الاول ولاو عمالقة واللي جاو من بعد بقاو كيتقاتلو باش يبان ليهم بلاصة

السر ديالهم هو الصبر الاستمرارية والفكر المختلف لان بزاف ديال الناس كيجربو نهار ولا جوج وكيسدو كيبقاو يقولو الانترنت مافيهش الزهر ولكن الزهر ماكاينش اصلا كاين الصبر كاين التعلم كاين انك طيح وتوقف وتعاود تجرب حتى تلقى الباب اللي يتفتح ليك

انا بنفسي طحت بزاف مرات كل مرة نقول هادي هي المرة اللي غادي ننجح وفالاخر كنصدم ولكن كل سقطة كتعلمني حاجة كل مرة كنولي اقوى حتى وليت عارف كيفاش نتعامل مع الصعوبات

الانترنت راه بحال البحر فيه موجات كبار وصغار اللي مايعرفش يعوم غادي يغرق واللي يعرف يركب الموجة المناسبة غادي يوصل للشط النجاح ماشي غادي يجي بالراحة ولكن غادي يجي مع العرق والنية والابداع

وخا الطريق طويلة وصعيبة ولكن كل نهار كتتعلم درس جديد وكل محاولة كتقرّبك للحلم ديالك والاهم ماتعتمدش غير على اليوتيوبرز ولا على الطرق الجاهزة حيت هما كيشرحو باش يجيبو المشاهدات ولكن انت خاصك تخدم عقلك وتبني بلاصتك بيديك

كنت كنجلس فالليل نفتح الحاسوب ونشد الورقة والقلم ونبدا نكتب الخطوات اللي سمعت فواحد الفيديو ونقول مع راسي غادي نطبقها بالحرف نكملها ونولي نربح ولكن الصدمة اني ندير النهار كامل وانا خدام ونفيق الصبح ماكاين والو حتى الريال ما دخل لعندي

كنبقا فهاد اللحظة كنسول راسي علاش انا مانجحش بحالهم علاش كنبقا غير كنشوف الفيديوهات ديالهم كيوريونا الارقام الكبيرة والنتائج المبهرة وانا كنبقا بلا نتيجة وفالاخر بدا يدخل عندي داك الاحساس ديال الاحباط كنولي مقهور ونفكر نحيد من الطريق كاملة

 ديما كيرجع عندي صوت صغير داخلي كيقولي ماغاديش توقف دابا راه خاصك تصبر راه خاصك تحاول مره ومرات حتى تلقى الباب اللي غادي يفتح ليك وبالفعل وليت كنجرب طرق اخرى ماشي غير اللي كيعطيو فاليوتيوب بديت نبحث على راسي

كنت فواحد المرحلة كنحاول نتعلم المونطاج كنت كنسهر حتى للثلاتة ديال الليل والعيون ديالي عامرين بالحمرة والراس كيدور من القهوة ولكن كنحس بواحد الاحساس زوين حيت كنبني مهارة جديدة وكان ديما عندي هاد الاحساس بلي يمكن هادي هي الحاجة اللي غادي تخرجني من داك الدوامة

مرة اخرى دخلت لمجال الكتابة وكنبدا نكتب مقالات بسيطة ونحاول نبيعها فالمنصات ولكن الصراحة ماكانش ساهل حيث المنافسة كبيرة وكل واحد باغي يخدم ولكن من بعد فهمت ان حتى لو ما ربحتش بزاف على الاقل تعلمت كيفاش نكتب مزيان وكيفاش نعبر على راسي وهدي فحد ذاتها مهارة

وكانت ايام اللي كنسهر فيها الليل كامل ونبقا نشوف اليوتيوب واحد الفيديو وراء الاخر كنقلب على شي طريقة جديدة وكنفيق مع الصبح بلا مانحس وانا مرهق ولكن بلا فايدة كنت كنحس براسي كنجري ورا السراب بحال واحد داخل فصحراء وكيجري ورا الما اللي ماكاينش

وفالأخير نقول ليك النجاح فالانترنت بحال الزرع خاصو وقت باش يطلع خاصو تسقيه وتبقى تحافظ عليه وفاش يجي النهار اللي يزهر فيه غادي تحس بلي التعب كامل ماكانش خسارة

تعديل المقال