ما هي مواقع الويب

ما هي مواقع الويب

نكملو معاكم الدورة ديال أساسيات الحاسوب والهدف دائما هو توصيل المفاهيم التقنية بطريقة مبسطة وسلسة باش أي واحد يقدر يفهم ويتعلم بدون ما يحس أن المعلومة ثقيلة عليه اليوم غادي نستمر فشرح الفرق بين الويب والانترنت ونزيدو نفصلو أكثر باش توضح الصورة عند الجميع وغادي نحاولو ما نطولوش ولكن نعطيو قيمة للمعلومة ونزيدوكم شوية نصائح مهمة في الأمان الرقمي وكيفاش تستعمل الانترنت بطريقة ذكية وآمنة

الانترنت راه شبكة عالمية ضخمة كتربط ملايين الأجهزة حول العالم وأي جهاز متصل بالانترنت سواء كان تليفون ولا حاسوب ولا تابلت راه ولا جزء من هاد الشبكة كاين اللي كيتخيل الانترنت بحال الويفي ولكن الفرق كبير الويفي مجرد وسيلة محلية كتوصل الانترنت لجهازك من الروتر ولكن الانترنت هو البنية التحتية اللي فيها كابلات تحت البحر وفي الأرض وسيرفرات وشركات مزودة بالخدمة واللي كتوصل ليك الانترنت عبر وسائل متنوعة منها الألياف البصرية ومنها 4G أو 5G أو حتى ADSL فالمناطق اللي فيها بنية قديمة

الانترنت فيه بزاف ديال الخدمات ماشي غير تصفح المواقع وخا هاد الخدمة هي اللي كتستعمل بكثرة ولكن راه فاش كتستعمل تطبيق بحال الواتساب ولا كتدير مكالمة فيديو عبر تطبيق زوم ولا كتخدم بلوتوث كيخدم مع الأنترنت فبعض الحالات ولا كتدير أبديت للتطبيقات راه كل هادشي كيتم عبر الانترنت يعني الانترنت راه أكبر وأشمل من مجرد تصفح المواقع

أما الويب فهو فقط واحد الجزء من الانترنت واللي فيه المواقع الإلكترونية اللي كتفتحها من المتصفح يعني كروم ولا فايرفوكس ولا سفاري ولا أوبرا هاد المواقع كتحتاج "يو آر إل" يعني رابط إلكتروني خاص بكل موقع الرابط كيبدأ غالبا ب https أو http ومن بعد كيتكتب اسم الموقع بحال google أو youtube أو facebook ومن بعد النطاق مثل com أو net أو org وهادي هي الطريقة اللي كتدخل بها للموقع

الناس كتستعمل المواقع الإلكترونية يوميا بدون ما يعرفو أنها فقط جزء من الانترنت وهادشي كيدير واحد الخلط عند بزاف من الناس اللي كيضنو أن الانترنت هو المتصفح ولكن الحقيقة هي أن المتصفح مجرد برنامج كيمكنك من الوصول للمواقع عبر خدمة الويب

المتصفح هو الوسيلة اللي كتخليك توصل للموقع والموقع هو الخدمة اللي كتوصلك بالمعلومة اللي كتقلب عليها ولكن راك كتستعمل الانترنت باش توصل لهاد الخدمة فمثلا فاش كتحل يوتيوب من المتصفح راك كتدخل للويب وفاش كتحل يوتيوب من التطبيق راك كتستعمل الانترنت ولكن ماشي بالضرورة كتستعمل الويب بنفس الشكل لأن التطبيقات كتتواصل مباشرة مع السيرفرات عبر ما يسمى بالواجهات البرمجية بلا ما تحتاج تعرض صفحات ويب تقليدية

الناس خاصها تعرف أن هاد الفرق ماشي غير تقني ولكن حتى أمني لأن كثير من عمليات الاحتيال كتم عبر المتصفح كيتصاوبو مواقع مزورة كتشبه بزاف للمواقع الأصلية مثلا موقع فيسبوك مزور ولكن فيه اسم شبيه وكيتبدل فيه حرف ولا رقم بسيط والهدف هو تسرق منك كلمة السر ولا بطاقة بنكية ولا أي معلومات شخصية

باش تحمي راسك من هاد النوع من الاحتيال خاصك ديما تشوف الرابط اللي كتبان فالأعلى وتشوف واش فيه القفل الصغير ولا لا هاد القفل كيكون علامة على أن الموقع مشفر وكيستعمل بروتوكول آمن للتواصل بينك وبين السيرفر والمعلومة اللي كتدخلها فيه ما كتكونش واضحة للناس اللي كيتجسسو ولا كيحاولو يخطفوها

خاصك تعرف أن القفل ماشي ضمانة مية في المية ولكن علامة مهمة كتساعدك تأمن راسك مثلا فاش تدخل لموقع فيه تسجيل دخول ولا فيه عمليات شراء ديال منتوجات ولا خدمات ضروري تشوف القفل وتراجع الرابط وتشوف واش فعلا أنت في الموقع الصحيح ولا لا وكتكون حذر أكثر خصوصا فاش كتلقى عروض مغرية بزاف ولا روابط جاوك من ناس ما تعرفهمش

هادشي ماشي كافي وحدو ولكن مهم جدا كبداية للتأمين الذاتي وزيادة على هادشي خاصك تتعلم ما تضغطش على أي رابط جاك في رسالة إلكترونية ولا في تعليق مشبوه ولا من أرقام غريبة فهادشي بزاف ديال الناس كيطيحو فيه وكيوليو ضحية سرقة بيانات أو تهكير الجهاز أو حتى استعمال الكاميرا والمايكروفون بدون علمك

الوعي التقني ضروري فهاد العصر حيثاش أغلب تعاملاتنا اليومية ولا فيها الانترنت والناس اللي كتستعمل الانترنت بلا ما تفهم كيفاش كيخدم راه معرضة بشكل أكبر للمشاكل ولهذا الهدف من هاد الدروس هو أن نخليو الناس تفهم الخدمة اللي بين يديها وتعرف تستعملها بطريقة ذكية وآمنة

منين كتكلم على المواقع والويب كنقصد المواقع اللي كتدخل ليها عبر المتصفح وهنا خاصك تتعلم كيفاش تميز بين موقع عادي وموقع رسمي وبين موقع آمن وموقع مشبوه مثلا المواقع الإخبارية الرسمية كتكون عندها نطاق معروف وغالبا كتكون عندها شهادة الأمان والقفل كيبان وعندهم سياسة الخصوصية واضحة ووسائل تواصل حقيقية أما المواقع اللي فيها فقط روابط غريبة وإعلانات كثيرة وشكل غير منظم خاصك تحذر منها

ومن بين النصائح اللي نحب نأكد عليها كذلك هي ما تخليش جهازك مفتوح لأي واحد ما تعرفوش وما تسجلش كلمات السر ديالك في المتصفح بلا كلمة مرور رئيسية وحاول ديما تحدث التطبيقات والنظام باش تسد الثغرات الأمنية اللي يمكن تستغلها الفيروسات أو الهاكرز

ورجعو دابا للنقطة الأساسية اللي بدينا منها وهي أن الانترنت حاجة كبيرة وواسعة كتشمل بزاف ديال الخدمات من بينها الويب ولكن ماشي كلها الويب كتستعمل الانترنت باش توصل لخدمات الويب ولكن كتستعملو حتى باش تخدم تطبيقات أو ألعاب أو خدمات تانية خارج نطاق المتصفح

الويب كيعتمد على بروتوكولات معينة بحال http و https وعلى سيرفرات كتعرض المحتوى وعلى متصفحات كتمكنك من التنقل بين الصفحات أما الانترنت فهو المستوى الأعم اللي فيه الإرسال والاستقبال ديال البيانات بأي شكل سواء عبر التطبيقات ولا الخدمات ولا حتى الأجهزة الذكية اللي كتتصل ببعضها فالأجهزة الحديثة مثلا بحال الكاميرات الذكية أو السماعات المتصلة أو حتى بعض أدوات المطبخ الحديثة ولاو كيحتاجو الانترنت باش يخدمو وهادي هي المرحلة الجديدة اللي ولات كتعرف بإنترنت الأشياء

نتمنى من خلال هاد الدرس أنكم تكونو قربتو أكثر لفهم الفرق ما بين الانترنت والويب وتعرفتو على الدور ديال كل واحد منهم وكيفاش كيتعاملو مع بعضهم وكيفاش تحمي راسك فهاد العالم اللي ولا جزء من حياتنا اليومية وهدفنا فهاد الدورة ماشي فقط نشرح ولكن نبسط ونساعد الناس يتخطاو الأمية الرقمية ويكون عندهم وعي رقمي يخليهم يستعملو التقنية وهم مطمئنين ومفاهمين كل حاجة

شكرا بزاف لمتابعتكم ومرحبا بأي سؤال أو توضيح فالتعليقات كيفما كان مستواك غادي نحاول نجاوبك ونسهلو ليك المعلومة باش حتى انت تستافد وتشجع ناس آخرين على تعلم هاد الأمور إلى اللقاء فالحصة الجاية إن شاء الله ومع موضوع جديد من مواضيع أساسيات الحاسوب ودمتم بخير وسلام

تعديل المقال