شنو هو VPN للهاتف وكيفاش غادي ينفعك

شنو هو VPN للهاتف وكيفاش غادي ينفعك

شنو هو VPN وكيفاش يقدر يفيدك فحياتك الرقمية اليومية خصوصا إيلا كنت كتستعمل تليفونك بزاف فالتصفح وتطبيقات التواصل ولا كتدخل لمواقع وأنت مشبك فويفي ديال القهوة ولا المحطة ولا شي بلاصة عامة

الواقع هو أنو التليفون ولى بحال خزنة كتجمع فيها كلشي معلوماتك صورك حساباتك كلمات السر ديالك والمشكل أن الأنترنت ماشي ديما بلا خطر وداكشي علاش خاص الواحد يكون ذكي ويحمي راسو قبل مايطيح الفاس فالراس

من بين الحلول السهلة والفعالة هو استعمال VPN

ال VPN فببساطة هو خدمة كتخليك تشبك بالأنترنت عن طريق سيرفر مختلف كيكون غالبا فشي بلاد أخرى وهاد الشي كيخلي هويتك الرقمية تبان بحال إيلا كنت فداك البلد ماشي فالمكان اللي أنت فيه فعليا وكيصعب بزاف على أي جهة تراقبك ولا تعرف شنو كتدير

المثال بسيط تخيل راسك فواحد المقهى مشبك مع الويفي ديالهم وبغيتي تدخل لبنك ديالك ولا تشوف حسابك فالتيليغرام ولا تبعث شي ملف خاص هنا كيبدا الخوف واش شي واحد يقدر يشوف شنو كتدير واش الشبكة آمنة واش التطبيق ما كيجمعش المعطيات ديالك

هنا بالضبط كيجي VPN بحال الدرع كيغلف الاتصال ديالك وكيخليه مشفر يعني حتى إيلا كان شي واحد حداك ولا فالشبكة ما يقدرش يفك الشفرة ديال الاتصال ولا يعرف شنو كيدور

بزاف ديال الناس اليوم ولات كتقلب على VPN مجاني للهاتف حيت ماشي كلشي مستعد يخلص وهادشي عادي ولكن ضروري يكون اختيارك ذكي وما تمشيش مع أول تطبيق صادفك فالستور

كاينين تطبيقات معروفة وموثوقة اللي كتوفر الخدمة بالمجان وبطريقة محترمة وماتجمعش بياناتك

خلي نحكي ليك على بعض التطبيقات اللي جربتها شخصيا وشفت شنو كيقدمو وشنو النواقص ديالهم باش تاخذ فكرة واضحة

نبدأ بواحد من التطبيقات اللي معروفة فالوسط الأمني واللي جا من شركة سويسرية كتخدم فالأمان والخصوصية تطبيق اسمو ProtonVPN

هاد التطبيق تقدر تحمليه من المتجر بسهولة وتدير حساب فابور مباشرة ملي تدخل كيعطيك اختيار ما بين النسخة المجانية والمدفوعة طبعا احنا غاديين مع المجاني

اللي زوين فهاد الخدمة هو أنها ما كتفرضش عليك حد معين فالبيانات يعني تقدر تبقى شابك نهار كامل وماتحبسكش ولكن فالمقابل كيعطيوك غير ثلاث دول تختار منهم باش تشبك

مافيهاش سيرفرات امريكية ولكن السيرفرات الأوروبية اللي عندهم خدامة مزيان السرعة مقبولة والتطبيق خفيف

الواجهة بسيطة بلا تعقيدات ومافيهاش إعلانات كتزعجك ماشي بحال بعض التطبيقات اللي كل دقيقة كيطّل عليك بانر ولا فيديو

تقدر تستعملو باش تفتح تيليغرام ولا بعض المواقع اللي محجوبة فبعض الشبكات وخصوصا فالمغرب كاين بزاف ديال المواقع لي كتولي محجوبة بلا سبب

من بعد جربت Windscribe

هاد التطبيق حتى هو كيعطيك خدمة محترمة فابور كيوفر ليك عشر جيجا فالشهر وبالنسبة لواحد ماشي داير فيديوهات بزاف ولا تحميلات ثقيلة راه كافي وزيادة

من ناحية الأمان كيعتمد على تشفير عالي وكيبقى يحمي الاتصال ديالك كيف ماكان مصدره وكيبقى خدام بلا مشاكل

الواجهة ديالو مزيانة وسهلة كتقدر تبدل السيرفرات وتراقب الاستهلاك ديالك وكولشي واضح

كاين بعد المرات كيبطأ ولكن فالمجمل السرعة مزيانة للتصفح والمواقع العادية

من التطبيقات القديمة اللي مازالو خدامين ومطلوبين Psiphon Pro

هاد التطبيق عندو طابع خاص كيعتمد على تقنيات مختلفة باش يتجاوز الحجب وفعلا كتلقى راسك كتحل مواقع ولا تطبيقات اللي فشي بلاصة ما كيتفتحو

الإعلانات فيه موجودة وشي مرات كيولي ثقيل شوية خصوصا فالليل ولكن كتقدر تعتمد عليه إيلا كنت فشبكة فيها تقييدات كثيرة

كاين واحد التطبيق اللي اكتاشفتو مؤخرا سميتو Atlas VPN

هاد التطبيق ماشي مشهور بحال البقية ولكن النسخة المجانية ديالو زوينة كيعطيك سيرفرات فبعض الدول المهمة وتقدر تستعملو مثلا باش تفتح نتفليكس من بلاصة أخرى ولا تخدم تطبيقات اللي كتطلب موقع برا المغرب

الواجهة شيك وسلسة ماكيتطلبش منك مهارات ولا تجارب كتيرة

داكشي علاش حسيت براسي مرتاح فيه خصوصا فالتنقل بين الدول وسرعة الاتصال كانت مستقرة

دابا نجي لواحد النقطة اللي كيسولو عليها بزاف الناس شنو الفرق بين VPN مجاني وواحد مدفوع واش يمكن نعتمد على المجاني بلا مانخاف

الواقع أن الخدمة المجانية كتفي بالغرض فحال كنت غادي تستعملها باش تحمي اتصالك فالويفي العام ولا باش تفتح موقع ولا تطبيق محجوب

ولكن إيلا كانت الاستعمالات ديالك كتطلب سرعة عالية ولا كتحمل ملفات كبيرة ولا خدام فمجال حساس هنا يمكن تحس أن الخدمة المجانية ما كافياش

النسخة المدفوعة كتفتح ليك عدد كبير من الدول كيكون فيها سرعة أفضل دعم تقني مخصص وخدمات إضافية

ولكن فالأخير هادشي كيرجع ليك وعلى حسب شنو كتحتاج

ماشي ضروري تمشي للمدفوع إيلا كنت الاستعمالات ديالك بسيطة

المهم هو تختار تطبيق موثوق ماشي أي VPN لقيتيه فالمتجر حيت كاينين تطبيقات شكلها مغري ولكن فالواقع كيستعملو اتصالك لأغراض إعلانية ولا كيجمعو بياناتك وباعوها لجهات خارجية

من الأحسن ديما تشوف التعليقات وتشوف تقييم التطبيق وتقرا سياسة الخصوصية باش تكون مرتاح

وما تنساش دير تحديثات للتطبيق ديالك حيت الأمان كيتطور مع الوقت وأي ثغرة جديدة يمكن تصلح فنسخة مقبلة

من بعد ما تركب VPN وتشبك بيه تقدر دابا تدير بزاف ديال الحوايج بحرية

تقدر تفتح سبوتيفاي ولا نتفليكس من بلاصة اللي ما كانوش خدامين فيها

تقدر تدخل لمواقع إخبارية عالمية كانت محجوبة بلا سبب

تقدر تحمي كلمات السر ديالك خصوصا إيلا كنت كتدخل للبنك ولا شي بلاصة حساسة من ويفي ديال عموم

وحتى تطبيقات الربح اللي كتطلب أنك تكون من أمريكا ولا أوروبا تقدر تجربهم بسهولة

وزيد عليها أنك تقدر تستعملو فالتيليغرام ولا ديسكورد ولا واتساب ملي كيتبلوكاو ولا كيتقطعو فالخدمة

وإيلا كنت خدام فالتجارة الإلكترونية ولا عندك خدمات مع ناس برا راه VPN كيعطيك استقرار وكيخلي الخدمة متواصلة بلا ما تبان كمستخدم مشبوه

الخلاصة أن VPN اليوم ما بقاش شي حاجة ثانوية ولا موضة راه ولى ضروري فحياتنا الرقمية خصوصا فالعالم اللي كيتغير بسرعة

استعمال VPN مجاني للهاتف ممكن ومفيد ولكن بشرط تعرف تختار التطبيق الصح وتكون واعي بحماية بياناتك

جرب التطبيقات اللي شاركت معاك وشوف شنو ناسبك

ProtonVPN فيه سرعة بلا حدود

Windscribe كيعطيك حجم بيانات محترم

Psiphon Pro كيتجاوز الحواجز بلا رحمة

Atlas VPN واجهته مريحة وسرعته مستقرة

كل واحد فيهم عندو نقطة قوة وانت واستخدامك

وخلي دايما فبالك أن الأمان فالأنترنت ولى من الأساسيات بحال مفاتيح الدار مايمكنش تخرج بلاهم

وخليك ديما صاحي فالنت ماشي كلشي آمن وماشي كلشي تيقة

VPN اليوم هو واحد من أدواتك باش تبقى حر وتحمي راسك فالعالم الرقمي

جرب ورد عليا شنو لقيت وشحال فرقات معاك التجربة

بلا سلام بلا وداع نقول ليك دير VPN وسير فحالك وانت مطمّن

تعديل المقال