أخطر كذبة فالربح من الإنترنت! ها علاش كتخسر وقتك بلا فايدة

أخطر كذبة فالربح من الإنترنت! ها علاش كتخسر وقتك بلا فايدة

علاش عدد كبير ديال الناس كيدخلو لعالم الربح من الانترنت وكيخرجوا منو محبطين علاش كيخسرو وقت وفلوس وماكيوصلوش حتى نص الطريق؟ واش فعلا الانترنت كيدير الفلوس؟ ولا كاين وهم كبير كيتم الترويج ليه؟

ازول سلام الله عليكم جميعا اخوتي واخواتي في اي بلاصة كنتو كنحييكم من القلب وكنشكركم على الدعم ديالكم على التعليقات ديالكم على كلماتكم الزوينة اللي كتخليني نستمر شكرا بزاف لكم والله يجازيكم بخير

اليوم بغيت نهضر معاكم على واحد الموضوع مهم موضوع كيتكرر بزاف فالتعليقات كيجيوني ناس بزاف كيسولوني علاش ماكنربحش علاش كلشي كيهضر على الانترنت والربح وانا ماوصلت لوالو فاش كنسمع كيعجبني ولكن فاش كنخدم كنصدم كنطيح كنحبط كنحس براسي كنضيع الوقت ديالي بلا فايدة

الانترنت راه فعلا عالم كبير عالم موازي كتقلب فيه كتلقى بزاف ديال الفرص كتلقى مجالات ما عندهاش نهاية ولكن فاش ما كتكونش عارف اش تدير كتحس براسك كتغرق فبحر بلا شط كتشوف الفلوس كتمشي عند ناس وانت باقي بلا نتيجة

الانترنت ماشي سحر راه ماشي عصا موسى اللي غادي تلوحها وتولي مليونير فالنهار الاول هاد الهضرة خاصنا نحيدوها من الدماغ ديالنا لانها خطر كبير كيضيع وقتك وطموحك وتقتك فراسك وكيخليك تفشل

انا خدام اونلاين من سنين عايش منو وكل نهار كنجرب وكنطيح وكنرجع نوقف فاش كنقولك راه الانترنت كيدير الفلوس راه كندوي عن تجربة ولكن ماشي بالطريقة اللي كتروج ليها القنوات اللي كيعجبهم يحلموك بلا اساس

خليني نكون معاك واضح الانترنت فيه بزاف ديال المجالات مثلا الطباعة عند الطلب بحال كيندل كي دي بي ولا ميرش ولا ريد بابل ولا تفتح ستور فبرينتيفاي وربطو مع اتسي كلشي هادشي ساهل نظريا ولكن فاش كتجرب كتلقى الواقع مختلف الحسابات كيتغلقو القوانين كتبدل مرة مرة السوق كيتشبع وكيبدا يحاربك بلا سبب

مثال بسيط كان عندي حساب فإتسي استثمرت فيه بزاف وكنت كنحقق مبيعات مزيانة فجأة تقفل بلا انذار حاولت نسترجعو حتى بعرض المال ولكن بلا فائدة حيث كاين بند اسمو حذف نهائي

نفس الشيء وقع لناس بزاف فميرش وريد بابل وغيرهم بلا سبب واضح كتلقى خدمتي قانونية وتصاميم نظيفة ومع ذلك كيتغلق الحساب يعني هنا فين كنرجعو لكلمة الاستقرار اللي فالانترنت منعدم ماكاينش شي منصة مضمونة مية فالمية

كنزيدك مثال افيلييت حتى هو عندو نفس المشاكل كتربح وكيجيك اغلاق الحساب وانت كتسنى فلوسك كتمشي عليك انا شخصيا وقع ليا هادشي مع امباكت

الادسنس كذلك رغم انه مهم ولكن راه كيعرف تقلبات كبيرة فاش كان CPM طالع كنت كنشجع الناس يديرو يوتيوب ولكن دابا نزل بزاف وبدا كيقتل المجهودات

وحتى في المواقع الادسنس مبقاش مربح بحال قبل علاش؟ لان الذكاء الصناعي دخل وولا كيقدم الاجوبة مباشرة للناس بلا ما يحتاجو يدخلو للموقع ديالك

سي بي اي كذلك راه فيه مشكل الترافيك تلقى ثغرة خدامة شهرين ثلاثة كتحترق كتبقى تحوس من جديد

الخدمات؟ السيرفيسز؟ الفايفر؟ راه الذكاء الصناعي ولا كيعوض بزاف ديال الخدمات اللي كنا نقدموها دابا موكلي ما بقاوش يطلبو بزاف حيت لقاو بديل ارخص واسرع

اي كوميرس؟ بحر كبييييير ولكن ماشي ساهل الكونتنت كرييشن؟ اذا ما عندكش شغف كبير راك غادي توقف من النص غادي تحبط وغادي تعيطها الراحة

شوف اخويا واختي الى بغيت تربح خاصك تتعلم مهارة وانا هنا كنقول اول مهارة خاصك تتعلم هي الانجليزية على الاقل الاساسيات باش تفهم المواقع باش تعرف تتعامل مع اي موقع انجليزي فالعالم

من بعد تعلم مهارة اللي عندها طلب كبير سوق كبير او فيها فرصة مستدامة ولكن خاصك تكون واعي ان حتى لو تعلمت وطبقت راه مكاينش ضمان للاستقرار

فكر فيها مزيان بزاف ناس ربحت بسرعة وخسرت بسرعة نفس السرعة اللي طلعت بيها طاحت بيها علاش؟ حيت النجاح المفاجئ بلا وعي كيتبعو فشل مفاجئ

انا دابا شنو السر اللي مخلييني باقي خدام فالمجال؟ هو التاقلم كنطيح كنوقف كيتسد باب كنقلب على باب اخر كل مرة كنبدل الستراتيجية ديالي كنشوف فين كاين الفرصة الجديدة

بدلت بزاف المجالات كنت كنخدم على الاكستنشنز دابا كنخدم على مشاريع ساس كنبنيها او نشريها ونبيعها كنبدل كنقلب كنعيش مع السوق

راه الانترنت ماشي فيه باب واحد فيه بزاف ديال البيبان لي تسد كاين لي يتحل خاصك تكون مرن تاقلم دير بحال البحر كلما تبدل الجو تبدل الموجة ديالك

كاين معادلة مهمة بزاف خاصك تسول راسك عندك الوقت؟ عندك المهارة؟ عندك المال؟ وخاصك تعرف شنو تستغل من هادو

عندك المال؟ خاصك تعرف فين تستثمرو وماتخليش الطماع يضحك عليك عندك مهارة؟ طورها وسوق ليها عندك الوقت؟ استغلو وتعلم

ماشي ضروري تكون غني باش تبدا ولكن ضروري تكون ذكي باش تستمر

الخلاصة؟ النجاح فالانترنت ماشي صدفة خاصو وقت خاصو صبر خاصو مرونة خاصو تجريب خاصو شوية ديال الفشل باش توصل للفهم العميق ديال المجال

وماشي كل شي كيتقال ليك على يوتيوب راه حقيقي دير عقلك قرا سوقك وركز على التعلم وكون صبور النجاح كيجي مع الوقت والاستمرارية

تعديل المقال