كارثة المشاهدات فاليوتيوب 😱 | علاش المشاهدات طايحة فهاد الأيام؟ | الأسباب الحقيقية لإنخفاض المشاهدات فالقنوات

السلام عليكم خوتي وخواتاتي فهاد التدوينة غادي نهضر معاكم على واحد الموضوع اللي والله حتى كيقلق وكيخلّي الواحد يحبط وخصوصا الناس اللي كيتعبو على الفيديوهات ديالهم وكيخدمو من القلب ولكن فالأخير كيشوفو المشاهدات طايحة بشكل ما مفهومش وكيبدا الواحد يسول راسو علاش المشاهدات ديالي نقصو بهاذ الطريقة علاش القناة كانت طالعة ودابا ولات خاسرة علاش الفيديوهات اللي كنت كنخدم عليها بالساعات ما كتوصلش الناس علاش التفاعل ولى صفر واش الخطأ مني ولا من الخوارزمية ديال اليوتيوب ولا من الجمهور ولا من التوقيت

أنا عارف الإحساس ديالك لأن حتى أنا فواحد الفترة كنت كنعيش نفس الأزمة وخا كننشر فيديوهات بجودة ومحتوى زوين كيبان لي بحال الناس ما بقاش كيعجبهم المحتوى ولا اليوتيوب ما بقاش كيبغيني ولكن الحقيقة أعمق من هكا

خاصنا نعرفو أن المشاهدات ماشي ديما كاتكون مستقرة كاين أيام كترتفع وكاين أيام كتنقص ولكن إيلا ولات المشكل مستمر وولات القناة بحالها ماتت هنا خاصك توقف وتشوف شنو واقع

أول حاجة خاصنا نفهموها هي أن اليوتيوب دار تغييرات كبيرة فهاد الشهور الأخيرة وولات الخوارزمية كتخدم بزاف بالذكاء الاصطناعي كتقيم الفيديو ديالك بلا ما تسولك واش الفيديو زوين ولا لا فقط كتقيس التفاعل النقرات مدة المشاهدة والكلمات المفتاحية وكتاخد القرار

ملي كتدوز ساعات على نشر الفيديو يوتيوب كيعطيك إشارات كتدل واش الفيديو ماشي مزيان ولا كاين أمل أنا مثلا فيديو درتو قبل أيام يوتيوب قالي راه الفيديو جاب تقريبا نفس عدد المشاهدات بحال الفيديوهات السابقة ولكن نسبة النقر على مرات الظهور ناقصة شوية

يعني هنا خاصك تسول راسك العنوان ديالي واش فعلا مشوّق واش الصورة المصغرة ديالي كتجبد العين ولا لا حيث هادو أول حاجتين كيلعبو دور كبير فالنقر وبدون نقرات ما كاين لا مشاهدات لا مقترحات لا والو

وخا يكون الفيديو خيالي فالطرح وفيه محتوى زوين وكيعجب الناس إيلا ماكانش اللي ضغط عليه راه غادي يبقى مدفون

العنوان خاصو يكون واضح فيه الكلمات اللي الناس كيقلبو عليها ويكون فشكل يحمّس الواحد يضغط

الصورة المصغرة خاصها تكون فيها تعبير فيها لون فيها شي عنصر يشد العين ولا شي كلمة ولات جملة كتخلي المشاهد يحس بالفضول

ممكن المشكل ماشي فالاسم ولا الصورة ممكن فقط أن التوقيت اللي كتخدم فيه ما بقاش مناسب للجمهور ديالك كتكون متعود تنشر فواحد الوقت وتبدلت عليه وولا الجمهور كيضيعك ولا كيتفرج فواحد آخر

وكاين كذلك تأثير الأحداث اللي كتوقع فالعالم بحال ماتشات كرة القدم ولا شي حدث سياسي كبير ولا حتى شي كارثة طبيعية كتخلي الناس كاملين متجهين لفيديوهات الحدث وكتولي الصفحة الرئيسية ديال يوتيوب عامرة بمقاطع اللي كتدور على داك الحدث ونتا الفيديو ديالك كيتزاحم معاهم ولكن ما كيلقاش الطريق باش يبان

حتى هادي كتلعب دور فهبوط المشاهدات خصوصا إلا كنتي كتخدم على مواضيع عامة وماشي على ترند معين

الترند هو سيف ذو حدين فمرة كيعطيك دفعة قوية وكيخليك توصل لمشاهدات كبيرة فنهار ولكن ما كيعيشش بزاف وكتلقى الفيديو نزل بسرعة

أما الفيديوهات اللي كتخدم بيها محرك البحث بحال مثلا كيفاش تدير هادي ولا شنو هو حل المشكل الفلاني راه كتطلع بشوية ولكن كتبقى خدامة وممكن تبقى تجيب المشاهدات شهور وسنين

أنا مثلا درت فيديو على طريقة استرجاع الفيديوهات المحذوفة أول نهار جاب غير شوية ديال المشاهدات ولكن دابا بدا يطلع فنتائج البحث ووصل لرقم مزيان

يعني المشاهدات اللي كاتجيك من السيرش هي اللي كتضمن بها الاستمرارية ولكن خاصك تعرف تخدم الكلمات المفتاحية وتكون عندك استراتيجيا واضحة

كاين حتى واحد المشكل آخر اللي ولا مأثر بزاف هو التحديثات اللي كيديرها اليوتيوب حيث كل مرة كيجي بتغيير فطريقة عرض الفيديوهات ولا فالأولوية ديال الخوارزمية

فاش كيتبدل النظام كيبداو القنوات كتحس بنقص فالظهور وفالمشاهدات وهدشي ماشي خاصك بوحدك كلشي كيتأثر

أحيانا القنوات الكبيرة كتبدا تطيح وأحيانا الصغيرة كتطلع غير حيث داك التحديث خدم مع واحد نوع ديال المحتوى وخلا نوع آخر يتراجع

فاش كتلاحظ المشاهدات ناقصة رد بالك ما تبقاش تلوم الجمهور ولا تحبط راسك ولكن راجع الخطة ديالك

شوف واش خاصك تبدل العناوين ديالك تكون أكثر دكاء وشد الانتباه

شوف الصورة المصغرة واش تستحق فعلا تكون مصغرة ولا كتحتاج تعديل

راجع توقيت النشر ديالك جرب أوقات مختلفة وشوف شنو خدام معاك أكثر

حاول دير توازن بين فيديوهات ترند باش تجبد مشتركين جداد وفيديوهات طويلة الأمد باش تحافظ على الاستمرارية

وما تنساش دير تحليلات دقيقة للفيديوهات ديالك شوف ف analytics شكون كيتفرج شحال كيدوز وسط الفيديو منين جا كيفاش لقاك وشحال من مرة دار skip ولا خرج بسرعة

وهادشي كامل غادي يعطيك فكرة واضحة على فين خاصك تخدم

وما تنساش أن اليوتيوب ولا كيشجع بزاف short videos ولكن حتى هو عندو سياسة خاصة يعني ماشي غير تدير فيديو قصير وتنتظر النجاح ولكن خصك تكون ذكي فالعرض والعنوان وشنو غادي تقول فالثواني الأولى

باش ترجع المشاهدات خاصك تكون مرن تراجع المحتوى ديالك تعاود تبني العناوين ديالك تحسن من الصور المصغرة وتكون مركز على الجودة أكثر من الكمية

وما تبقاش تعول بزاف على فيديو واحد يعمر القناة راه النجاح فبناء مكتبة فيديوهات متنوعة وكل واحدة فيهم كتجيب لك جمهور من نوع مختلف

خليك ديما كتتبع الترند ولكن ما تضحيش بالقيمة الحقيقية ديال القناة ديالك

وخلي عندك النفس الطويل وما تستسلمش حيث حتى الكبار كيدوزو من هادشي

وأنا متأكد أنه إلا خدمتي بذكاء وبقلبك غادي ترجع تشوف التفاعل والمشاهدات كتطلع من جديد

المشكل ماشي فيك ولكن خاصك تعرف كيفاش تفهم التغييرات اللي كيدير اليوتيوب وتواكبها وما تخليش القناة تموت بسبب الإهمال ولا الكسل

كل فيديو كدير فيه مجهود راه كيحسب ليك فالطريق ومرة غادي يجي داك الفيديو اللي غادي يبدل كلشي

وماشي عيب تخسر أيام ولكن العيب هو تحبس بلا ما تجرب طرق جديدة

اليوتيوب راه خدمة حقيقية خاصها الصبر والتحليل والمواكبة وأهم حاجة العقلية الصحيحة

نتمنى تكون فهمت الصورة مزيان وخا طولت عليك ولكن الموضوع كبير وكيستاهل

تعديل المقال