كيفية تنزيل برامج من الويب 

ليوم غادي نكملو معاكم الدورة ديال أساسيات الحاسوب وغادي نركزو على واحد المهارة اللي أي واحد كيستعمل الحاسوب خاصو يعرفها لأنها من الأمور اليومية اللي كتحتاجها فاستعمالك للجهاز وهي طريقة تحميل وتثبيت برنامج من الانترنت بطريقة آمنة وسهلة وهاد الدرس مهم بالخصوص للناس اللي باقيين جداد فالعالم الرقمي ومازال ما متعودينش على كيفية التعامل مع المواقع والمتصفحات ولا كيعرفوش كيفاش يتعاملو مع النوافذ اللي كتظهر ليهم وقت التثبيت

أول حاجة كتديرها فاش بغيتي تنزل شي برنامج هو تفتح المتصفح اللي عندك فالحاسوب ديالك والمتصفح هو داك البرنامج اللي كتدخل به للمواقع بحال كروم أو فايرفوكس أو مايكروسوفت إيدج واللي هو المتصفح اللي كيجي مدمج مع نظام ويندوز تلقائيا يعني حتى إلا كان جهازك جديد أو فرمتيه مؤخرا راه ضروري يكون فيه مايكروسوفت إيدج بلا ما تحتاج تثبتو من جديد وهو اللي غادي تبدأ به الرحلة ديالك

دابا نجيوا لكيفاش تنزل أول برنامج مثلا بغيتي تنزل متصفح جوجل كروم اللي هو من أشهر المتصفحات وأكثرهم استعمالا كتفتح مايكروسوفت إيدج وكتدخل لمحرك البحث اللي فيه وغالبا كيلقاوه هو بينج ولكن تقدر مباشرة تكتب في شريط العنوان العلوي جملة البحث اللي بغيتها مثلا كتب جوجل كروم تنزيل أو Google Chrome download باش تلقى الروابط اللي كتوصلك للبرنامج

من بعد ما كتبتي الجملة اللي كتبحث عليها كيبانو لك بزاف ديال النتائج لكن خاصك تكون ذكي وتعرف تختار الرابط الصحيح والموقع الرسمي ديما خمم قبل ما تكليك على شي رابط وشوف شنو مكتوب فيه ملي تشوف رابط فيه مثلا google.com أو chrome.google.com فراه هادا هو الموقع الرسمي ديال المتصفح اللي بغيتو ولكن إلا لقيتي رابط فيه كلمات غريبة أو اسم موقع ماشي مألوف فالأفضل تبعد عليه باش ما توقعش فالفخ وتلقى راسك حملتي شي برنامج مشبوه فيه فيروسات أو برمجيات خبيثة

منين تدخل للموقع الرسمي ديال كروم غادي تلقى زر فيه كلمة تحميل أو تنزيل وغالبا مكتوبة Download بالإنجليزية فكتضغط عليه وغادي يبدأ الملف كيتهبط أوتوماتيكيا وغادي تلقاه كيهبط في الجزء السفلي من المتصفح أو غادي يبان فواحد الركن فالشاشة على حسب نوع المتصفح اللي كتستعمل

المكان اللي كيتم فيه حفظ الملفات اللي كتنزلها من الانترنت غالبا هو مجلد اسمه التحميلات أو Downloads اللي كيكون في القرص الرئيسي للحاسوب ديالك وتقدر توصل ليه من أي نافذة كتفتح فيها الملفات وكتلقاه فالقائمة الجانبية من جهة اليسار

منين كتهبط الملف وتلقى البرنامج محفوظ عندك خاصك دير عليه نقرتين بالفأرة باش تبدا عملية التثبيت وهاد العملية كتعرف أيضا باسم دوبل كليك يعني كتضغط بسرعة على الزر الأيسر للفأرة جوج مرات على التوالي وغادي يبان ليك واحد المربع في وسط الشاشة فيه طلب تأكيد واش بغيت فعلا تثبت البرنامج وغالبا كيكون فيه زرين واحد مكتوب عليه نعم أو Yes وواحد مكتوب عليه لا أو No خاصك تكليك على الزر اللي فيه نعم باش تستمر

مباشرة من بعد كتبدأ عملية التثبيت وغالبا كيكون فيها مجموعة من النوافذ اللي فيها خطوات بسيطة مكتوبة بالإنجليزية أو العربية على حسب لغة النظام ديالك وكتلقى فيهم أزرار بحال التالي أو Next وكتضغط عليهم كل مرة باش تمشي للخطوة اللي وراها وخاصك ديما تقرا مزيان شنو مكتوب خصوصا إلا كان كيعرض عليك تثبت برامج إضافية أو يغير شي إعداد فالنظام فالأفضل دير إلغاء لهاد الخيارات وتستمر غير فالتثبيت ديال البرنامج اللي أنت بغيتيه

فاش تكمل هاد العملية كاملة غادي يبان عندك البرنامج في قائمة البداية أو على سطح المكتب وغادي يكون جاهز للاستعمال وفي حالة كنتي بغيتي تخليه هو المتصفح الرئيسي مثلا فكتدخل للإعدادات ديال النظام وكتقلب على المكان اللي كتختار فيه المتصفح الافتراضي وكتبدل الخيار لجوجل كروم وهاكا كل مرة كتحاول تفتح شي رابط من برا الحاسوب غادي يتحل أوتوماتيكيا فكروم

هاد الطريقة ماشي خاصة فقط بجوجل كروم بل تقدر تستعملها لأي برنامج بغيتي تحمله من الانترنت سواء برنامج للتعديل على الصور أو برنامج خاص بالفيديو أو برنامج الأوفيس أو غيرو ولكن دائما خاصك تتأكد من أنك كتحمل من الموقع الرسمي ديال البرنامج وهادشي كيكون سهل إلا درتي بحث مزيان واخترتي الروابط اللي فيها أسماء مألوفة ومعروفة

كاينين بزاف ديال المواقع اللي كتوفر برامج ولكن فيها مخاطر حيث كتكون مملوءة بالإعلانات أو كتدفعك باش تحمل برنامج مختلف على اللي طلبتي وهنا خاصك تكون واعي ومتأكد من أي خطوة كديرها لأن خطأ بسيط يقدر يدخل الفيروسات لجهازك ويخربليك النظام أو يسرق منك معلومات حساسة بحال كلمات السر أو المعطيات البنكية

من الأمور اللي كتزيد فالأمان ديالك فهاد النوع من العمليات هو أنك تكون مركب برنامج مضاد للفيروسات وكتخليه يخدم ديما باش يرصد أي خطر أو ملف مشكوك فيه وغالبا الأنظمة الجديدة بحال ويندوز عشرة أو ويندوز حداش فيها حماية مدمجة اسمها Windows Defender ولكن كاينين أيضا برامج خارجية كتقدر تزيد تحميك أكثر وكتعطيك إنذارات فورية لأي نشاط غريب

والأهم من هادشي كامل هو أنك ما تتسرعش ومتاخدش أي خطوة إلا كنت فاهمها ومتيقن منها يعني ديما وقف فكل خطوة وقراها بتمعن وفكر شنو غادي يدير هاد البرنامج ولا شنو ممكن يغير في النظام ديالك وواش فعلا كتلزمو أو غير حطوه فالموقع باش يتثبتو برامج إضافية كتكون غالبا غير مفيدة

وإذا كنتي كتستعمل جهاز ديال الخدمة ولا كتقراه فيه ولا كتخزن فيه معطيات خاصة راه ضروري تكون أكثر حرصا لأن أي اختراق بسيط يقدر يضيعلك مجهود كبير ويدخلك فمشاكل أنت فغنى عنها ولهذا نصيحتي الدائمة هي الوعي التقني ومعرفة الأساسيات ماشي ترف ولا كماليات بل ضرورة فهاد العصر

وخا الشرح باين وبسيط كيبقى مهم بزاف لأن بزاف ديال الناس ما كيعرفوش كيفاش ينزلو البرامج وكيوقعو فمشاكل بلا ما يحسو وهادي فرصة باش نوصلو هاد المفاهيم بطريقة واضحة ومناسبة لجميع المستويات ونتمنى أنكم تكونو استفدتوا من هاد الشرح وإذا عندكم شي استفسار ولا بغيتو تعرفو شي حاجة أكثر يمكن لكم تخليو تعليق وغادي نحاول نجاوبكم ونعاونكم

غادي نكملو معاكم فالدروس الجاية إن شاء الله وندخلو في مواضيع جديدة بحال تنظيم الملفات واستخدام البرامج الأساسية وتنظيف الحاسوب والتعامل مع الأخطاء الشائعة فالنظام إلى ذلك الحين نتمنى لكم تجربة موفقة في التعامل مع الحاسوب ومرحبا بيكم دائما فهاد الدورة التعليمية ودمتم بخير وسلام

تعديل المقال